قصيدة رثاء شهداء مذبحة نجع حمادى للشاعر فــايــز البهجــورى



كتبها فايز البهجوري

الأربعاء, 10 فبراير 2010 17:39



فى صبـاح يـوم عـادى



فى مدينـة نجـع حمـادى



الأربع ..سته يناير.. ألفين وعشره ميلادى .



كان الصباح نـادى .. و كل شيئ هـادى .



والضهر كان عـادى



والكل متفـــائلين ؟







الليله ليلة ســلام ..



ذكرى ميلاد المسيح .



عادت مع الأيـــام .



بتجــدد الأيمـــان ..



بتـذكــر الانسان ..



بالحب .. بالتسامح .. بالعيش فى سلام



للخـلـق أجمعــين .



الليله ليـلـة عــيــــد ..



عيد الميلاد المجيــد ..



عمل النصارى حسابه ولبسوا هـدوم العــيـد ..



وع الكنيسه رايحــيــن .



------ * ------



راحو النصارى الكنيسه بعضهم صايمين



راح يحضروا القــداس .. وتـنهـم راجعـين



وتـتــلم كل العيـله .. وياكلـوا أكـل العيـد..



ويهنـوا بعضيهم .. بعيد ميلاد مجــيـد



وربنــا يعــوده باليمـن والبركات ..



على كل المصريين.



------ * ------



وخططـوا لبـكـــره .. حيـزوروا ميـن وميـن .



حيعيــدوا على مين .. و يـــدوا العيـديه لميـــن



أوياخـدوا العيـديه من ميـن ..



.



بيشوى فريد لبيب ..حيـزور عيــال عـمـه .



كالعاده يـوم العيـد .. الكـــل يتلـمـــوا..



سـعــدا .. وفـرحـانـين.



و بولا عاطف يسى .. رايـح على خـالـه .



ياخد العيديه منـه.. ومن مرات خالــــه..



زى ولاده التـــانـــيين.



ومينا حلمى سعيد .. حيقضى يوم العيــد..



حيـروح على النـادى ويقضى وقت سعيـد



مع شلتـه الباقــيين.



وأبانوب كمال ناشد كان عنده امتحـان



حيعيـد نص اليـوم ويذاكـر درسه كمان



حيعمـل ايـه .. مسكين.



لكن رفيق رفعت راح ينزل على بهجــوره ..



عشان يشوف حـالـه .



ويعـدى على فرشـوط .. يـدى هدية العيـــد..



لكل عمــاله .



عـاده بقـالها سنيـن .



وأيمن زكريا لوقـــا .. راح يفضل جـوه البيـت ..



يستقبـل الـــزوار.



وحينـزل آخر اليـوم.. حيعيـد على جيـرانه ..



ويقضى كام مشوار .



وهــكــذا الباقـــيين .



جوزيف صمويل الباشا وأبنوب نشأت وشنوده



شــبــان فى عـمـر الــورد .



ومايكل وكيرلس نصرى . وأبرآم وجـورج ووجــدى



ما فيش مـره أســاءوا لــحـــد



أخــلاق .. وثقــافـه .. وديــن .



------ * ------



أحــلام.. أحــلام.. أحــلام ..



لمـلايكـــه وســط وحــــوش .



ما خطـر أبـدا على بالــهــم ..



راح يجـرى دا اللى جــرالهم



والصبـح حـيـجى عليـهم ..



جـرحى أو مش عايشـــين ؟؟؟؟؟



------ * ------



وجـه وقت القــداس .. وده فرحـه لكل النـاس .



كان رأى الأنبا كيرلس ينتهى بـدرى الـقـداس.



كان خايف من مجهـــول ..



كان جـــوه قـلبـه احسـاس..



كان عـايــــل هــم النــاس .



ودى شيمة رجأل الديـــن.



وانتهى بدرى القـداس.



سلمـوا على بعض النـاس



بعـدين خرجـم للشـارع



راجعيـن ع البيت جعــانين



------ * ------



واتحرك أهــل الشـر..



وقـلـوب ســودها الغــدر..



ونفـوس أعماها الحـقــد ..



بتحــــركـها الشيـاطـــين .



وفجـأه طلـع من جــوه الغـابه ..



غـــول شرقــان بـيـمـص الــــدم.



جايـب بعض عيـاله معاه قـلبـوا فرح العيـد بالغــــم.



قـــال لعيـاله يللا بهمه : اقتـــل ..اقتـل .. اسفـك دم



اقتـل ..احـرق .. خـرب ..دمـر اقتــل.. اقتــل .. ولا تهتـــم .



ولا فى حــد حيجــى يحاسبـك ..



لا من الأمـن ولا من الشرطه ..



لا من الحـزب ولا من السلطه ..



دول أقبـاط ...مالهمش حساب ..



واحنـا وهـما كمـان عـارفين ؟؟؟؟؟؟



------ * ------



داسو عياله على الرشاش ..



تاك ..تاك ... تاك. بم ...بم...بم.



وخرج منه رصاص الغــدر .



اشى فى البطن.. واشى فى الرجل ..واشى فى القلب..



واشى فى الصدر



قلبــوا الشـارع بركـــة دم .



وسقط الشهدا فى غمضة عـيـن.



------ * ------



وبعد ما شبعوا .. وقف الضرب .



جـريـوا الخـلـق يشوفــوا حصاده .



مين ده هناك عمـال يتــلـوى ؟



ومين دول غـرقـــوا فى بركـة دم ؟



ومين ده المرمى فى الناحيه دى ؟



وفى الناحيه دى وفى الناحيه دى ؟



قالوا دا بولا عاطف يسى



واللى هناك ده كيرلس نصرى .



وفى الناحيه دى جــورج وأيمن



واللى هناك ده بيشوى مع وجدى.



ودول أبرآم وجـوزيف صمويل



واللى هناك ده مايكل فـوزى.



وأبانوب نشأت فى الناحيه دى



وأبانوب ناشد فى الناحيه دى



وفى الناحيه دى شنوده منير



واللى بعيــد ده رفيــق مرقولى .



ومين ده ياعينى عمال يصرخ قـالوا ده مينا حلمى سعيد



صرخ الشعب بحـرقـه وقـــال : ليه قتـلوهم ليلة العــيــد!!!!



احنا فى غـابــه ومش عارفــين !!!



------ * ------



وفــاق الخــلـــق من الصدمه دى .



بعد ما هـزت شعب الوادى



حادث هـز مشاعر العالم من أمريكا لنجـع حمادى



وخـرج الأقبـاط فى مظاهرات .



فى كـنـدا ..وقبرص .. وبريطانيا..



وفى ألمانيا .. وفى اليـونـان.



فى سيدنى وميلبورن .. وفى ايطاليا .



وفى الدانيمرك ..وفى الفاتيكان



و فى أمريكا.. وفى بلجيكا وفى هـولنــدا.. ونيــوزلنـدا ..



ودى فى النمسا ..ودى فى سويسرا..



وغيرها وغيرها فى كل مكان.



------ * ------



خرج الأقباط حمـــلوا نعـــوش



صوتهم دوى بالهتافات.



* حسنى مبارك يارئيس ..دم القبطى مش رخيص



* يا داخلية فينك فينك.. قتـلــوا ولادنـا .. قُــدام عينــك.



* مش فردية.. ولا جنائية....ديه جريمة طائفية.



* أوعى يامصرى تخون أفكارك .. قتل المصرى دا عارى وعارك



وعلى النحو ده سمع العالم



من أقباط مصر الصرخات.



------ * ------



وقال العالم كلمه لمصر .



قـــالوا كفاية حـقـد ودم .



طهـروا غابـــة نجع حمادى .



من غيلانها ومن تعابـيـنـها



ومن عقاربها فى المره دى .



قالوا تعابينها كتـروا كتيـــر؟؟؟



قـالوا علاجهم هو "الحـاوى" يقطع راس تعبان تعبان.



والغيلان بتصول وتجـــول ؟؟؟



قالوا خـــدوهم غـول ورا غـول .



واقطعوا راسهم ..و اقطعوا ديلهم واقطعوا كل لسان بيقـــول :



اسفكوا دم البنى آدمين .



------ * ------



وكان بالصدفه فى اللحظه دى



راجل مش من نجع حمادى



كان فى زياره للتجـــار



سمع الضرب وطلق النار



قال فى مصيبه فى نجع حمادى.



سأل الخلق وقال فيه ايــــه ؟



ليه الطلق ده كـلـه ليـــه ؟



عرف القصه .. دمه فـــار



قال يامصر " دى وصمة عـار".



ايه وصلنـــا للحـــالـــه دى !!!



وضرب الراجل كـــف بكــف.



وفضل واقـف كـده مذهــول.



احنا فى غابه وللا فى حرب ؟



ده اللى بيحصل مش معـقـــول .



ولا فى الحاضر ولا فى الماضى !!!



فين حكومتنـا راحت فيــــن ؟؟؟



فين الأمـــن الساهر فـيـــن ؟؟؟



بعد ما كانت مصر عـــمـــار..



نـعـــق فيها "غـــراب البيـــن"..



قلب الأبيـــض فيها رمــــادى



------ * ------



ومسك ورقـــه وخـــط كـــلام وكتب فيها كـــام مــــوال.



عـبــر فيها عن أحـــزانه على "مصر المحروسه" وقـال :



ليه مـيـتــك يانـيــل .. لما وصلت مصر .. اتـلـوثـــت بالــدم ؟



و ليه ولادك يامصر... قـلبـوا الحياة فيها .. نـكـد وحـزن وغـم



ومين يقـــول للى فجــــر... واللى افــتــــرى : اتـــلـــم



وليه سماءك يامصر.. بعد الصفـا فيها .. سيطر عليها الجـــراد ؟



جـه من خـــرابة الجيران..أسراب ورا أسراب .. ينشر رقاب العـبـاد



ويـهـــدد الآمنـــين .. والمسئولين ساكـتــيـن .. وكـلـه باسم الجـــهـــاد



وليه حضــارتك يامصر.. طمسوا معـــالمها .. بفـكـــر وهـــابــــى



بــــدل ثقافتـــها ..هــــدد سلامتـــها..بسجـــل ارهــــابــــى



وصنـفــــوا ولادهـــا .. كافـرين ومؤمنـــين



والعاقلين ساكتين .. والمسئولين نـــايـــمــــين .



على مـفتــــى ارهــابـــى



والفــكـر وهــابــى



والفــكـر وهــابــى



------ * ------



ورنم الأقباط... ترنيمة الشهداء... شهــــداء نجع حمادى:







ترنيمة شهداء مذبحة نجع حمادى



ابكى ..ابكى .. يا أبونا مكارى أصرخ نادى يسوع الفــادى



قتـلوا رفيـق.. قتـلوا أيمـن.. قتـلوا بيشوى.. فى نجع حمادى



بـولا ومينا .. وأبانوب ماتـوا اتقـتـلوا فى حادث استشهادى



لـيـا النـقـمـه - يقــول الرب- أجـازى من قتـلوا أولادى



------ * ------



ابكى ..ابكى.. يا أنبا كيرلس نادى بأعلى صوتك نــادى



قتـلوا سبعه وجرحـوا تمانيه من أولادنا فى نجع حمادى



مين يحمينا ياربنـا غيرك مين ينصرنا فى الأيـام دى



لـيـا النقــمه يقــول الرب أجازى من قتـلوا أولادى



------ * ------



نادى ياقبطى ربك نادى نادى بأعلى صوتك نادى



روح الحقد وروح الشر قتلوا الحب فى نجع حمادى



دم القبطى مش حيروح مهما اتظلموا فى الدنيا دى



لـيـا النقــمه يقــول الرب أجازى من قتـلوا أولادى



------ * ------



الصبرالصبر ياوالـدة بـولا ابنك وسط الشهدا ..شهـيـد



الصبر الصبر يا أم بيشوى دا فى الفـردوس بيقضى العيـد



الصبر الصبر ياوالد مينـا دا فى الملكوت فرحان وسعيد



الصبر الصبر ياأسرة أيمن هو فى السما يحضر تمجـيـد

الصبر الصبر يا أبــو أبانوب صلى بحرقه وقول للفادى

لـيـا النقــمه - يقــول الرب- أجازى قتـلة نجع حمادى



------ * ------



وانتى ياماما يأ أم رفيـق ربنـا حبـه مع الباقـــيين



رفيق مش راجع على بهجوره رفيـق فى حضن القديسين



ويـاه تسعه من بهجـــــوره اتقتلوا فى عام سبعه وتسعين



رفيق بيـــرتــل مع زملاؤه شهـدا الغـدر فى نجع حمادى



لـيـا النقــمه يقــول الرب أجــــازى من قــتـــلوا أولادى



------ * ------



نادى ياقـبـطـى ربك نــادى اصرخ.. زلزل ..أرض الوادى



أبانوب مات.. وبيشوى مات وبولا سبقهم فى الناحيه دى



مينا و أيمن.. ورفيق ماتوا ليه اتقتـلوا فى نجع حمادى



دم الشـهـدا مش حيـضيــــع ولا فى الحاضر ولا فى الماضى



لـيـا النقــمه يقــول الرب أجـازى من قتـلوا أولادى



فايـز البهجــورى



---------------------------------------------------------------------------------



رجاء محبة : أن يقوم أحد منظمى احتفالات ذكرى الأربعين لشهداء مذبحة نجع حمادى ، فى أى موقع فى العالم ، بتلاوة هذه القصيدة على أرواح الشهداء ، كمساهمة من موقع " الأقباط الأحرار" فى ذكرى الأربعين لشهداء مذبحة نجع حمادى



---------------------------------------------------------------------------------







أسماء شهداء مذبحة نجع حمادى فى 2 يناير 2010



أبانوب كمال ناشد - أيمن زكريا لوقا – بولا عاطف يسى – بيشوى فريد لبيب - رفيق رفعت وليم – مينا حلمى سعيد – أيمن صادق هاشم



وأسماء الجرحى هم :



كيرلس وجيه نصرى (16 سنه )



شنوده منير شهدى (22 سنه )



وجدى شنوده فتحى (25 سنه )



جوزيف صمويل الباشا (21 سنه )



أبانوب نشأت (18 سنه )



أبرآم نبيل يوسف (18 سنه )



جورج يوسف فرج (21 )



مايكل عاطف فوزى (29سنه )






تعليقات

المشاركات الشائعة من هذه المدونة