ياراكب دماغك يااكبر عنيد
هتعند هنعند دا مبدأ اكيد
هتسقع هنسخن
وصوتنا هيتخن
ويعلى ويعلى
ويصبح شديد
مفيش بينا ساتر
ما راحوا العساكر
ومهما تذاكر
هتفضل بليد
ياطايل بإيدك
ياسيد عبيدك
عشان بس افيدك
محناش عبيد
ياراكب دماغك يااكبر عنيد
هتعند هنعند دا مبدأ اكيد
ياحاطط مصيرك لوحدة فى كفه
وحاطط بلدنا ومصيرها فى كفه
وهمك سيناريو لخروجك يليق
وتكريم تنوله وخيبه وزفه
وتحرير ميدانك صبح فى احتلال
ومليون عصابه وهوجه وجمال
وشعبك بسببك صبح فرقتين
فريق فى اليمين وفريق فى الشمال
بكرة التاريخ يشتكيك للى كتبه
ويكرة وجودك فى ورقه وكتبه
ويوضع قانون للى يتحط فيه
يكون حد واعى لشعبه وغضبه
يكون اختيارة بنزاهه وامانه
ويعرف مكانتك ياارض الكنانه
ويرفع رياتك يابلدى ويعرف
بأن التساهل فى حقك خيانه
ياراكب دماغك يااكبر عنيد
هتعند هنعند دا مبدأ اكيد
مفيش بينا ساتر
ما راحوا العساكر
ومهما تذاكر
هتفضل بليد
تعليقات