صاحب القداسة - هالة المصرى

يا وطن عامل دماغ

 

كل شعب مصر ثاير

مـ إللى حاصِل مـ الجَزاير

بهدلونا وهَزَّأونا ... طَلَّعُوا ميتين أبونا

هُمَّ ليه بيكرَهونا

قُلتَها وأنا دَمِّى فاير

فى السُّودان أخدت صوره

للى راجِع عينه عُورَه

وإللى مضروب فوق دماغُه

هى حَرب وللا كُورَه

وإللى قلبُه مش نضيف

جاب كتاب إنجيل شَريف

فى المُدَرَجات وِوَلَّع

فيه. تَصَرُف كان سَخيف

ولعوا الإنجيل كإنُّه فَحم أو عِلبِة سَجاير

*****

وإللى شُفناه فى السُّودان

كان هنا فـ ديروط كمان

ناس حقوده بَهدِلِتنا

ناس ده إيه لأ قُول تيران

إيه يا مصر بس مالِك؟

إيه مِغَمِّى عيون عِيالِك

إحنا ليه أكلنا بَعض

وإنتى ياأمَّه إيه جَرى لِك؟

السَّواد عَشِّش فى أرضِك والخَراب دَه كاس وِداير

*****

وِفـ قِنا فَرشُوط حَزينه

مالكوا ياولاد الَّذين

هُوَّ يعنى تار وبايت

بين مِحَمَّدين ومينا؟

أصلُه دِمِّل كان مِعَبِّى

هُوَّ كُره مِستخبِّى

وأمَّا آن أوانُه بان

آه يا حيرتى آه يا غُلبى

إحسِبُوا الجَرحى وقولوا لى أد إيه حَجم الخَساير

*****

هات يا عَم قَهوَه سادَه

إرحموا الأقباط يا ساده

مِحتاجين قانون مُوَحَد

نِبنى بيه دُور العِبادَه

وإللى هَيشوَح بِسِيفُه

فى الكِنيسَه ويعلَى زِيفُه

مش نِقول مَجنون وعادى

يِعمِل إللى على كِيفُه

إكشِفوا كُل الحَقايق قَطَّعُوا كُل السَّتاير

*****

وإللى يِغلَط أو يِخُون

قِبطى , مُسلِم فيه قانون

وإلى يِنهَب حَق غيرُه

دَه مَكانُه فى السُّجُون

إحنا فِعلاً فى إحتياج

حق يِعدِل المَزاج

كلمتين فى جلسه عُرفى

دول مُسَكِن مش عِلاج

يَعنى مِن أوِّل خِناقَه والجُثَث تِملَى الشَّكاير

*****

يا وَطن عامِل دِماغ

عَن طَريق الحَق زاغ

ياللى فيك الرُّوح بِتِرخَص

بالكتير بتساوى صاغ

يا وَطَن يا حِتَّه مِنَّا

إنتَ ليه فَرَّقت بيننا؟

حتى فى البطاقه عامِل

خانَه كاتِب فيها ديننا

إمتى نِتساوَى فى أرضَك إمتَى هَتهِل البَشاير؟

كلمات الشَّاعر رمزى بشاره