ويدخلون فى التدوين افواجا صورة يقول الشيعة انها للحسين والامام على

من شهر ومن باب الفضول دخلت على مدونة الفنان خالد الصاوى وكمان سبت تعليق واتارى هو كل ماحد بيسيب تعليق بيضمة للجروب تبعة - وبيتخيل ان كل المعلقين هم اسرة فضائية من انتاجهم واخراجهم وابداعهم

http://khaledelsawy.blogspot.com/

اظرف شئ ان كل الى بيعلق عندة انا باخد خبر على اميلى وكلهم اصحاب مدونات وعلى كل شكل ولون

وطبعا مش دايما اطالع مين علق ولكن احيانا كدة اقعد ابص

واليوم لقيت تعليق من مدونة ولما رجعت لمدونتها لقيت انها ظريفة اوى فيما كتبت عن الفالنتين باسلوب كوميدى

ورغم انها روت الرواية باسلوب ساخر الا انها نجحت كتيرفى نقل المعلومة بطريقتها - وعلى فكرةالصورة المنسوبة للحسين انا خدتها من مدونتها

وادى الموضوع نقلا عن مدونة نميمة عالمصطبة



هابى فالنتين داى لكل حبايبى اللى بيشرفونى على البلوج
اللى بيسيبو تعليقات واللى مش بيسيبو
سماح بقه النهاردة عيد الحب
وبالمناسبة دى يلا نتكلم شوية عن عيد الحب
عيد الحب له اكتر من قصة واكتر من اسطورها اشهرها
انه القديس او الكاهن سانت فالنتين كان يعاصر عهد الامبراطور الرومانى كلاوديس الثانى وهو كان قلبه حجر شوية مش حنين زيى انا كدة
وكان بيمنع زواج كل جنوده اللى فى الجيش بتاعه عشان لما يطلعو الجبهة يبقى مركزين فى الحرب يعنى وميركزش انه لما يموت هيسيب وراه العيال وام العيال
لكن القديس يظهر معجبوش الكلام دة وشاف انه كل واحد من حقة يتجوز
فكان بيجوزالجنود اللى عاوزين يتجوزو فى السر بدون علم الامبراطور
لكن متعرفش واد مين ابن لذينة راح فتن عليه للامبراطور
الامبراطور جابه من قفاه وحتى مخلهوش ياكل الفته والكوارع اللى كان قاعد بياكلها ساعه لما الحراس جابوه واللى كان موصى عليهم عم ابوهرقل الجزار اللى على اول الناصية وراح عشان يقابل الامبراطورودار بينهم الحوار ده
الامبراطور: هو اية العبارة؟
فالنتين:العبارة فى الشكارة اشترى اسمنت المصرية وانت تعرف
الامبراطور:انت هتصيع عليا ياض
فالنتين:ابدا والله حضرتك دة انا بتكلم جد جرب اسمنت المصرية انتاج مصرى وقصرك هيقع فوق راسك ويخلصنا منك
الامبراطور:اية؟
فالنتين:اقصد هيخلصنا من حضرتك
الامبراطور:نعم يا ننى عين ماما؟
فالنتين : اقصد جرب اسمنت المصرية وانت تدعيلى
الامبراطور:انت هتصيع عليا ولا اية يا برنس؟
فالنتين:(فى سره) دة شكله امبراطور من بولاق, انا مش فاهم عظمتك بتتكلم على اية؟
الامبراطور:انا سامع انه فى اوشاعة بتقول انك بتجوز الجنود بتوعى لستات
فالنتين :لا لا محصلش
الامبراطور:انت هتستعبط شكلى هستخدم معاك اسلوب البوليس المصرى وانت اصلا شكلك مينفعش معاك غير كدة
فالنتين اخد اول قفا واعترف وخر زى كوز المحبه المخروم اللى عاوز بنطه لحام
فالنتين:خلاص ياباشا كفاية كدة خصيمك النبى
الامبراطور:ها بتجوزهم لستات ولا لا(بيشخط فيه اوى)؟
فالنتين:امال اجوزهم لرجاله سعادتك؟
الامبراطور:انت هتستعبط تانى ياض ,هاتولى الفلكة
فالنتين:اه عظمتك انا بجوزهم لستات
الامبراطور:مش المشكلة انهم ستات المشكله انى سمعت انهم مزز جامدة اوى ودة هيعطلهم عنهم دفاعهم عن جبهتنا
فالنتين :ما سيادتك عارف ان هو دة النوع الموجود فى اوروبا لو عاوز نغير الصنف ممكن نستورد ليهم ستات مضروبة من تايوان
الامبراطور:بتستظرف تانى يا ننى عين ماما طب اعدام يا برنس
واعدم القديس سانت فالنتين وخرجت وارءه الجماهير فى ذلك الوقت وهما بيرددوا كلمة واحدة
باااااااااااااااااااااااطل باااااااااااااااااااااااااطل موت فالنتين بااااااااااااااااااااااااااطل بااااااااااااااااااااااااطل
ووقفو كلهم امام قصر الامبراطور الظالم الذى يريد تفرقتهم عن بعض مهللين بشعاراتهم فى ذلك الوقت
انا وحبيبى روحين فى زكيبة ...انا وحبيبى روحين فى زكيبة
مش هتقدر تفرقنا
وبعد كدة لما دخلت روما فى النصرانية قاموا ببناء مقام للراجل البركة دة
اقصد تم بناء كنيسة فى المكان اللى اعدم فية تخليدا لذكراه
كان يوم الاعدام دة يوم14 فبراير ودة سبب تخصيص اليوم دة كعيد للحب لان الغرب فى رايهم ان الراجل دة مات فى سبيل تقريب القلوب وتجميع الاحبه اتنين اتنين وانت يا قلبى حبيبك فين
انتظر تعليقاتكم
*************************
تحديث
ملحوظه هامة عشان فى ناس بعتتلى على الايميل بيسالونى الموقع اللى انا نقلت منه الكلام دة فين
انا اللى كاتبه الكلام ده ومالفاه بنفسى وانا مش بغش من حد وفى بعض المواقع بقت بتسرق منى وانا مش حاطة الصورة بتاعة التحذير عشان اللى يفكر يسرق حاجة منى من فراغ
بقولها تانى اهو انا مش بغش من حد
انتظر تعليقاتكم

http://namema2.blogspot.com/



تعليقات

‏قال غير معرف…

المشاركات الشائعة من هذه المدونة