الخميس، نوفمبر 20، 2008


وسمعنى سلام الضوء الشارد للعمدة ياولد

كتبت هالة المصرى




مخفيش عليكم ان نفسوياتى زفتون- وعلشان كدة الاحداث بتمر ولا تعليق منى رغم انى كنت عاوزة اكتب فى اكتر من موضوع مهم منهم فوز الشريف اوباما ابن الست او ماما وحفيد رجل الاعمال اللامع شى واوا -وبقول شريف لان الاشراف فى بلدنا قالو ان اصولة من السادة الاشراف وهم قبائل منحدرة من ال البيت (مدد يااوباما )!
وبرضو مش هاخبى ان كتر المضايقات والتربص من اياهم( الهى مايتسمو )وهم عارفين روحهم خلتنى اتخنق واقعد مندهشة من المعادلة الى مش لاقية لها حل وهى انى فى مواجهة بمفردى مع الجهاز البغيض سئ السمعة الى اكيد اكيد ربنا هيرزقة بحملة تطهير لان ضررة اكتر من نفعة ومحدش جايب لبلدنا الملامة من الخواجات الى لابسين قبعات وبيرصدو الانتهاكات الا اداء افرادة الغبى والى سمعت انهم بيعدو لى مكيدة لانهم مش متقبلين اصلا وجود ناشطة زى حالاتى وبيتعاملو بمنطق ان دى الحرمة الفاجر الى حدانا الى لازم نربيهاو نعلمها الادب !!
وبالرغم من كل الخنقة الا انى حقيقى فرحت بتعيين العمدة ايفا كيرلس عمدة كمبوها خلفا لابوها - وكمبوها دى قرية اغلب سكانها اقباط وهى فى محافظة اسيوط وعل فكرة كنت هافرح اكتر واكتر لو اتعين لاى قرية عمدة باسم فاطمة او زينب ودة معناة ان الاعتراف بحق الست فى تولى منصب قيادى امر حدث عمليا- وكمان مش اى منصب -لالالالالالالالالا دى عمدة والعمودية حكم وظبط وربط وفض مشاكل وتحالفات وحاجات كتيروخصوصا ان كمبوها قرية مش هادية وفيها مشاكل احيانا بين الاصدقاء الالداء المسيحيين والمسلمين ولكن للحق العمودية عندهم ماطلعتش من عند المسيحيين -اى نعم العمدة ايفا عضو بالحزب الوطنى ولكن وطنى ولا يابانى اهى اتعينت وكسرت الحاجز النفسى
وفرحت برضو لغرض فى نفس يعقوب- ويعقوب هنا هو هالة - والغرض كسر القاعدة العبيطة والزبالة ان الست جسم وعشم وساعة حلوة وخط ساخن وعروض من اياها ومساومات وادينى قطة من شفايفك الحلوين ياتفاحة دة انا حبيبك حاحا بتاع الصراحة راحة- ياااااااااااااااة اعوز بالله من جنس اسمة الرجالة ! ومصيبتها سودا الى تبقى شاطرة شوية او بتفهم شوية ويبقى لها كيان ولو محدود - ياعينى يشتغل الهدم فيها من حيث تدرى ومن حيث لاتدرى وبكل الاسلحة المقدسة والمدنسة ويااااااااااااااة لو غير انها شاطرة حلوة شوية -يبقى ليلة ابوها مطينة بطين ياوهدان - وتفضل ياعينى تعد السنين وكل ماتكبر شوية تقول الحمد لله وكل مالشعر الابيض يزحف برضو تقول الحمد لله وياحبذا لو التجاعيد كمان يبقى مليون حمد لله
يمكن خطوة ايفا دى تكون محسوبة وممكن تكون ارتجالية وممكن تكون من باب التكتيك الكامن فى الوعى الامنطقى للحزب الامعقول الا ديموقراطى الامبريالى التوسعى الاستطيانى اياة وخصوصا ان ايفا مش بعيد عن عمو عبد المحسن صالح الموالى للجناح المحافظ الى مقطع نفسة فى المعركة مع جناح رجال الاعمال ومن دول لدول يامصرىلاتحزن
ولكن بكل تاكيد تعيينها حسنت نفسوياتى ياجودعان
مبروك للعمدة ايفا هابيل كيرلس عمدة كمبوها اسيوط
أسيوط (مصر) - رويترزمصر

.. أول امرأة تشغل منصب "العمدة" في قرية مسيحية
استقبل أهالي قرية مصرية نبأ تعيين امرأة عمدة عليهم خلفا لوالدها بالابتهاج والفرح، وستكون بذلك أول مصرية تشغل منصب العمدة. وأصدر وزير الداخلية حبيب العادلي قرار تعيين ايفا هابيل كيرلس عمدة لقرية كمبوها بحري التي تسكنها أغلبية مسيحية في محافظة أسيوط التي تبعد عن القاهرة حوالي 400 كيلومتر جنوبا. وقال سكان في القرية انهم استقبلوا نبأ تعيين كيرلس بالابتهاج والفرح. وقالت كيرلس (53 عاما) الاثنين 17-11-2008 انها ساعدت أباها لسنوات طويلة وهو في المنصب وانها كانت تتمنى أن تصبح عمدة بعده. وقالت "ساعدت والدي في أعماله منذ عام 1990 بعد أن ضعفت صحته الى أن توفي عام 2002 عن عمر يناهز 85 عاما." وأضافت أنها أحبت العمل السياسي والاهلي منذ طفولتها. وتابعت "شاهدت أبي عن قرب أثناء عمله كعمدة وتمنيت أن أصبح عمدة في يوم من الايام." وفي الغالب يرث أبناء العمد مناصب آبائهم. لكن هذه هي المرة الأولى التي تعين فيها ابنة عمدة في منصب أبيها الشاغر. ولكيرلس شقيق ضابط في القوات المسلحة منعه عمله العسكري من شغل المنصب. وتخرجت كيرلس وهي غير متزوجة في كلية الحقوق جامعة عين شمس بالقاهرة عام 1980 وعملت بالمحاماة وهي عضو نشط في الحزب الوطني الديمقراطي الحاكم. وقال الرئيس حسني مبارك في المؤتمر السنوي الخامس للحزب الذي عقد هذا الشهر ان الحزب يبحث توسيع عضوية البرلمان لزيادة عدد شاغلي مقاعده من النساء. وخلال المؤتمر تحدثت كيرلس أمام مبارك عن نشاطها الحزبي وأنها مرشحة لمنصب العمدة في مسقط رأسها. وقبل سنوات شغلت امرأة منصب رئيس مدينة في محافظة سوهاج المجاورة. واختيرت أكثر من امرأة مسلمة في الشهور الماضية للعمل في منصب المأذون الشرعي. وعين والد كيرلس في المنصب بقرار من الملك الراحل فاروق عام 1951 وعين والده في المنصب بقرار من الملك فؤاد الاول عام 1940. ومناصب العمد قاصرة على القرى في مصر وأعباؤها صعبة لاشتمالها على العمل الشرطي من قبيل حفظ الأمن وجمع التحريات ومعاينة الحوادث بما في ذلك حوادث القتل. وكيرلس عضو منتخب في المجلس الشعبي المحلي لمحافظة أسيوط
.


إرسال تعليق